മെച്ചപ്പെട്ട ജീവൻ താഴ്ന്ന ജീവന്റെ ന്യൂനതകളെയും കുറവുകളെയും വിഴുങ്ങുന്നുവെന്ന് ഞങ്ങൾ ചൂണ്ടിക്കാട്ടുകയുണ്ടായി. നമ്മുടെ മനുഷ്യ ജീവന്റെ ന്യൂനതകളെയും കുറവുകളെയും ദിവ്യ ജീവൻ വിഴുങ്ങുമെന്നാണ് ഇതിനർത്ഥം. ക്രിസ്തുവിൻ്റെ ജീവനിൽ അവൻ്റെ ക്രൂശീകരണത്തിൻ്റെ കൊല്ലുന്ന ശക്തി ഉള്ളതിനാലാണ് ഇത് സാധ്യമാകുന്നത്. ആൻ്റിബയോട്ടിക്കുകൾ രോഗാണുക്കളെ കൊല്ലുന്നതുപോലെ, ക്രിസ്തുവിൻ്റെ ജീവനിലെ കൊല്ലുന്ന മൂലകം നമ്മിലെ പ്രതിലോമ കാര്യങ്ങളെ ഇല്ലാതാക്കുന്നു. നമ്മുടെ മനുഷ്യജീവനെ വിട്ടുകൊടുക്കുവാനും അത് ക്രിസ്തുവിൻ്റെ ജീവൻ കൊണ്ട് പകരംവെയ്ക്കപ്പെടുവാനും നാം ആഗ്രഹിച്ചേക്കാം. നമ്മുടെ ജീവൻ "അണുക്കൾ" നിറഞ്ഞതാണെന്ന് നമുക്ക് തോന്നിയേക്കാം, അതിനാൽ അത് ദിവ്യ ജീവൻ കൊണ്ട് പകരംവെയ്ക്കപ്പെടുവാൻ നാം ആഗ്രഹിക്കുന്നു. ഇത് നമ്മുടെ വഴിയായിരിക്കാം, എന്നാൽ ദൈവത്തിന്റെ വ്യവസ്ഥയിൽ ഇത് അവന്റെ വഴിയല്ല. ക്രിസ്തുവിൻ്റെ ജീവൻ നമ്മുടെ ഉള്ളിലെ എല്ലാ ന്യൂനതകളും കുറവുകളും "അണുക്കളും" വിഴുങ്ങുക എന്നതാണ് അവൻ്റെ വഴി. കർത്താവായ യേശുവിനോട് നാം അവനെ സ്നേഹിക്കുന്നുവെന്നും അവനുമായി ഒന്നാകുവാൻ ആഗ്രഹിക്കുന്നുവെന്നും എത്രയധികം പറയുന്നുവോ അത്രയധികം ആത്മിയ ആൻ്റിബയോട്ടിക്കുകളിലുള്ള കൊല്ലുന്ന ശക്തി നാം അനുഭവമാകും. നമുക്കാവശ്യമായ എല്ലാ മൂലകങ്ങളും ക്രിസ്തുവിൻ്റെ ജീവനിൽ ലഭ്യമാണ്. അവൻ്റെ ജീവനിൽ കൊല്ലുന്ന മൂലകവും പോഷിപ്പിക്കുന്ന മൂലകവുമുണ്ട്. നിങ്ങളുടെ സഹജസ്വഭാവത്തെ സംബന്ധിച്ച് നിങ്ങൾ നിരുത്സാഹപ്പെട്ടവർ ആയിരിക്കാം. എന്നാൽ ക്രിസ്തുവിൻ്റെ ജീവൻ നിങ്ങളുടെ സഹജസ്വഭാവത്തിലുള്ള പ്രതിലോമ മൂലകത്തെ നശിപ്പിക്കുകയും, തുടർന്ന്, നിങ്ങളുടെ സഹജസ്വഭാവത്തെ വലിച്ചെറിയുന്നതിനുപകരം, അവൻ അതിനെ ഉയർത്തുകയും ഉപയോഗിക്കുകയും ചെയ്യും.