വിവിധ തരത്തിലുള്ള സൃഷ്ടിക്കപ്പെട്ട ജീവനുകളിൽ വച്ച് ഏറ്റവും അത്ഭുതകരമായത് മനുഷ്യജീവനാണ്. അനേകരുടെയും അഭിപ്രായത്തിന് വിരുദ്ധമായി, ദൂതന്മാരുടെ ജീവൻ മനുഷ്യജീവനേക്കാൾ അത്ഭുതകരമല്ല. ദിവ്യ ജീവൻ ഉൾക്കൊള്ളുവാൻ ദൈവം ദൂതന്മാരുടെ ജീവനെ നിയോഗിച്ചിട്ടില്ല. മറിച്ച്, അവൻ ദിവ്യ ജീവനായുള്ള പാത്രമായി മനുഷ്യജീവനെ സൃഷ്ടിച്ചു. ദൈവത്തിന് ദൂതന്മാരോടുള്ള സ്നേഹത്തെക്കുറിച്ച് ബൈബിൾ പറയുന്നില്ല, മറിച്ച് അത് മനുഷ്യനോടുള്ള അവൻ്റെ സ്നേഹത്തെ വെളിപ്പെടുത്തുന്നു. ദൂതന്മാർ ദൈവത്തിൻ്റെ സേവകന്മാർ മാത്രമാണ്. അവൻ്റെ ദൃഷ്ടിയിൽ, അവൻ്റെ എല്ലാ സൃഷ്ടികളിലും ഏറ്റവും അത്ഭുതകരമായ ജീവൻ മനുഷ്യജീവനാണ്. നിങ്ങൾ ദൈവത്തിൻ്റെ സ്വരൂപത്തിലും ദൈവത്തിൻ്റെ സാദൃശ്യത്തിലും സൃഷ്ടിക്കപ്പെട്ടവരാണെന്ന് നിങ്ങൾ തിരിച്ചറിയുന്നുണ്ടോ? നാം കുരങ്ങന്മാരുടെ പിന്തുടർച്ചക്കാരല്ല, മറിച്ച് ദൈവത്തിൻ്റെ സ്വരൂപത്തിൽ സൃഷ്ടിക്കപ്പെട്ട മനുഷ്യൻ്റെ പിന്തുടർച്ചക്കാരാണ്. ദൈവത്തിൻ്റെ സ്വരൂപം ഉള്ളതുകൊണ്ടും ദൈവത്തിൻ്റെ സാദൃശ്യം വഹിക്കുന്നതിലൂടെയും നാം കാഴ്ചയിൽ ദൈവത്തെ പോലെയാണ്. ഒരു ദിവസം, ക്രിസ്തുവിൻ്റെ ജഡാവതാരത്തിലൂടെ ദൈവം താൻതന്നെ മനുഷ്യനായി. ഈ രീതിയിൽ ദൈവം മനുഷ്യനുമായി തന്നെത്തന്നെ താദാത്മ്യപ്പെടുത്തി. ജഡാവതാരം ചെയ്ത ദൈവമായ, യേശു, ദൈവവും മനുഷ്യനും ആയിരുന്നു. ക്രിസ്തുവിൻ്റെ ജഡാവതാരം ദൈവത്തെ മനുഷ്യൻ്റെ തലത്തിലേക്ക് താഴ്ത്തുക മാത്രമല്ല, അത് മനുഷ്യനെ ദൈവത്തിൻ്റെ തലത്തിലേക്ക് ഉയർത്തുകയും ചെയ്തു. സൃഷ്ടിയിലൂടെ മനുഷ്യന് ദൈവത്തിൻ്റെ സ്വരൂപവും ദൈവത്തിൻ്റെ സാദൃശ്യവും ഉണ്ടായിരുന്നു, എന്നാൽ അവനിൽ ദൈവത്തിൻ്റെ യാഥാർത്ഥ്യം ഉണ്ടായിരുന്നില്ല. ജഡാവതാരം ദൈവത്തിൻ്റെ യാഥാർത്ഥ്യത്തെ മനുഷ്യനിലേക്ക് കൊണ്ടുവന്നു. കർത്താവായ യേശുവിന് ദൈവത്തിൻ്റെ സ്വരൂപവും സാദൃശ്യവും മാത്രമല്ല ഉണ്ടായിരുന്നത്; അവൻ ദൈവത്തിൻ്റെ യാഥാർത്ഥ്യത്തെ ദേഹരൂപമെടുത്തിരുന്നു, കാരണം ദൈവം അവനിൽ ഉണ്ടായിരുന്നു.