മത്താ. 1:21—അടിക്കുറിപ്പ് 1

യേശു എന്നത്, രക്ഷകനായ യഹോവ അഥവാ യഹോവയുടെ രക്ഷ എന്ന് അർഥമുള്ള എബ്രായ പേരായ യോശുവ (സംഖ്യ. 13:16) എന്നതിന് തുല്യമായ യവനപദമാണ്. അതിനാൽ, യേശു കേവലം ഒരു മനുഷ്യനല്ല, യഹോവയാണ്, കേവലം യഹോവയുമല്ല, നമ്മുടെ രക്ഷയായിത്തീരുന്ന യഹോവയാണ്. അങ്ങനെ, അവൻ നമ്മുടെ രക്ഷകനാണ്. അവൻ, നമുക്കുള്ള നല്ല ദേശമായ, താൻ തന്നെയായ വിശ്രമത്തിലേക്ക്, നമ്മെ കൊണ്ടുവരുന്നവനായ നമ്മുടെ യോശുവയുമാണ് (എബ്രാ. 4:8; മത്താ. 11:28-29).

CNT യിൽ നിന്നുമുള്ള ഉദ്ധരണികൾ:

a. ജഡാവതാരത്തിലൂടെ

കർത്താവായ യേശു ജഡാവതാരം ചെയ്ത ദൈവമാണ്. ജഡാവതാരത്തിലൂടെയാണ് യഹോവയായ അവൻ, യഹോവ നമ്മുടെ രക്ഷകനായിത്തീർന്നത്. യഹോവ എന്നാൽ "ഞാൻ ആകുന്നവൻ" (പുറ. 3:14) എന്നാണ്. ദൈവം മാത്രമാണ് നിത്യനായവൻ. ഭൂതകാല നിത്യത മുതൽ വരുകാല നിത്യത വരെയും, അവൻ ഞാൻ ആകുന്നവൻ ആണ്. കർത്താവായ യേശു ജഡാവതാരം ചെയ്ത യഹോവ ആയതിനാൽ, "അബ്രാഹാം ഉളവായതിനുമുമ്പേ, ഞാൻ ആകുന്നു" (യോഹ. 8:58) എന്ന് അവനു തന്നെക്കുറിച്ച് പറയാൻ കഴിഞ്ഞു. ജഡാവതാരത്തിലൂടെ യഹോവ നമ്മുടെ രക്ഷകനായി.

b. നമ്മുടെ പാപങ്ങളിൽ നിന്നും നമ്മെ രക്ഷിക്കുവാൻ

നമ്മുടെ രക്ഷകനായ യഹോവ എന്ന നിലയിൽ കർത്താവായ യേശു നമ്മുടെ പാപങ്ങളിൽ നിന്നും നമ്മെ  രക്ഷിക്കുന്നു,  നമ്മുടെ പാപത്തിൽ നിന്നും പാപങ്ങളിൽ നിന്നും, നമ്മുടെ ദൈനംദിന ജീവിതത്തിലെ എല്ലാ മുറുകെപറ്റുന്ന പാപങ്ങളിൽ നിന്നും, സാത്താൻ്റെ ദുഷ്ടശക്തിയിൽ നിന്നും, ദൈവം കുറ്റംവിധിക്കുന്ന സകലത്തിൽ നിന്നും, എല്ലാ പ്രതിലോമമായ കാര്യങ്ങളിൽ നിന്നും അവൻ നമ്മെ രക്ഷിക്കുന്നു. അനുദിനം ചെറുതും വലുതുമായ എല്ലാ പാപങ്ങളിൽ നിന്നും നമ്മെ രക്ഷിക്കുന്നവനെന്ന നിലയിൽ, നമുക്ക് ക്രിസ്തുവിനെ നമ്മുടെ രക്ഷകനായും നമ്മുടെ രക്ഷയായും അനുഭവമാക്കുകയും ആസ്വദിക്കുകയും ആവിഷ്കരിക്കുകയും ചെയ്യുവാൻ കഴിയും. നമ്മെ രക്ഷിക്കുവാൻ നാം അവനെ വിളിക്കുമ്പോഴെല്ലാം, അവൻ നമ്മുടെ രക്ഷകനായ യഹോവയാണ്, നമ്മുടെ രക്ഷയായ യഹോവയാണ്.